மட்டு நகர் அரசினர் தமிழ் கலவன் பாடசாலை வருடாந்த விளையாட்டுப் போட்டி

மட்டக்களப்பு கல்வி வலயத்திற்குட்பட்ட சத்துருக்கொண்டான் புளியடிமுனை அரசினர் தமிழ் கலவன் பாடசாலையின் வருடாந்த இல்ல விளையாட்டு போட்டி நேற்று (08) ஞாயிற்றுக்கிழமை பிற்பகல்  02.30 மணியளவில் பாடசாலையின் அதிபர் எஸ் . சேகர் தலைமையில் பாடசாலை மைதானத்தில் இடம்பெற்றது.

இந்நிகழ்வுக்கு அதிதிகளாக மட்டக்களப்பு வலயக்கல்வி பணிப்பாளர் கே. பாஸ்கரன், மண்முனை வடக்கு கோட்ட கல்வி அதிகாரி எ.சுகுமாரன் ,உதவிக்கல்வி பணிப்பாளர் , உடற்கல்வி  வி .லவக்குமார் , லயன்ஸ் கழக ஆளுநரின் பிரத்தியோக செயலாளரும் , மட்டக்களப்பு கிரிக்கெட் சம்மேளத்தின் தலைவருமான என் .பி .ரஞ்சன் , ஆசிரியர் ஆலோசகர் திருமதி அருளம்பலம் ஆகியோர் கலந்துகொண்டனர்.

ஆரம்ப நிகழ்வாக அதிதிகளை பாடசாலை மாணவர்களால் மாலை அணிவித்து  அழைத்து வரப்பட்டனர். இதனை தொடர்ந்து  தேசிய கொடி, பாடசாலை கொடி மற்றும் இல்ல கொடிகள் ஏற்றி தேசிய கீதம்  இசைக்கப்பட்டது. இதனை தொடர்ந்து ஒலிம்பிக் சுடர் ஏற்றி மாணவர்களின் சத்தியபிரமாண நிகழ்வுடன் விளையாட்டுகள் ஆரம்பமானது.

இப் பாடசாலையின் இல்லங்களான வள்ளுவர், விபுலானந்தர், நாவலர்  ஆகிய இல்ல மாணவர்களின் விளையாட்டுகள் மிக சிறப்பாக இடம்பெற்றன. மாணவர்களின் விளையாட்டுகளை தொடர்ந்து ஆசிரியர்கள், பெற்றோர்கள் பழைய மாணவர்களின் விளையாட்டுகளும், வினோத உடை போட்டிகளும் இடம்பெற்றது.

இப் பாடசாலையின் இவ் வருட இல்ல விளையாட்டு போட்டிகளில் பங்குபற்றி வெற்றி பெற்ற மாணவர்களுக்கும் பரிசில்கள் வழங்கப்பட்டது. இப் பாடசாலையின் இவ் வருட இல்ல விளையாட்டு போட்டியில்  275 புள்ளிகளை பெற்று  வள்ளுவர்   இல்லம் 3 ஆம் இடத்தையும்,  365  புள்ளிகளை பெற்று விபுலானந்தர் இல்லம் 2 ஆம் இடத்தையும், 453 புள்ளிகளை பெற்று  நாவலர் இல்லம் முதல் இடத்தையும் பெற்றுக்கொண்டதுடன் வெற்றி கிண்ணங்களும் வழங்கப்பட்டது .

2015 ஆம் ஆண்டுக்கான  பாடசாலை இல்ல விளையாட்டு போட்டியில் நாவலர் இல்லம் அதிக புள்ளிகளை பெற்று பாடசாலையில் இல்ல சம்பியனானமை குறிப்பிடத்தக்கது.