உளநலப் புனர்வாழ்வு நிலையத்தில் யோகா பயிற்சிக் கூடம் திறந்து வைப்பு

மட்டக்களப்பு மாவடிவெம்பு உளநலப் புனர்வாழ்வு நிலையத்தில் யோகாப் பயிற்சிக் கூடம் திறந்து வைக்கப்டுள்ளதாக அந்நிலையத்தின் பணிப்பாளரும் சிரேஷ்ட உளநல மருத்துவருமான பி. ஜுடி ரமேஷ் ஜெயக்குமார் தெரிவித்தார்.

சனிக்கிழமை 08.04.2017 இரவு இடம்பெற்ற இந்நிகழ்வில் யாழ்ப்பாணப் பல்கலைக் கழகத்தின் பேராசிரியர் தயா சோமசுந்தரம் பிரதம அதிதியாகக் கலந்து கொண்டார்.

நாட்பட்ட உளநோய், மதுபோதை, மற்றும் பலவேறுவகைப் பாதிப்புக்குள்ளான ஆண்களுக்கும் பெண்களுக்கும் அவர்களின் குடும்பங்களுக்கும் இந்நிலையத்தில் புனர்வாழ்வளிக்கப்படுகின்றது.

அதேபோல் பாடசாலையிலிருந்து இடைவிலகிய பெண்களுக்கான வாழ்வாதார மற்றும் வாழ்க்கைத் திறன் சார்ந்த தொழிற் பயிற்சிகளும் இந்நிலையத்தில் வழங்கப்படுகின்றன.

உளநலன் தேவைப்பட்டோரும் இந்த தொழில்வழிப் புனர்வாழ்வுப் பயிற்சியில் ஈடுபடுகின்றார்கள்.

தையல் பயிற்சியை  முடித்துக் கொண்ட அத்தகைய 20 யுவதிகளுக்கு சான்றிதழ்களும் வழங்கி வைக்கப்பட்டன.